今日母親節，唔想出去同人逼食飯，於是我同細妹贊助媽咪去旅行，另外我煮咗兩樣嘢畀媽咪食：

剛睇完開心大發現介紹，用乳酪來醃牛扒或其他肉類會好好味，於是我試吓用呢個方法來醃豬扒，又上網搵到阿蘇剁豬扒的秘訣。我照板煮碗，整出來的豬扒果然鬆軟！

炸豬扒：

材料：豬扒4塊、日式麵包糠1/3包、粟粉(或麵粉)適量、蛋半隻

醃料(依次落)：糖1茶匙、胡椒粉適量、鹽1/8茶匙、生抽2/3湯匙、純味乳酪1湯匙、麻油1/3茶匙

做法：

1. 用刀背剁豬扒的一面，再用刀拍鬆兩面就ok，唔使剁晒兩面，否則就會太淋，再將每塊豬扒切開一半。

2. 依次落醃料拌勻後放進雪櫃。(我醃了4小時)

3. 豬扒依次佔粟粉或麵粉、打勻的蛋液、麵包糠。

4. 用中大火燒熱鍋，加油燒一陣，用木筷子插進油中，有泡圍著筷子就可以落豬扒，唔可以等油太熱先放，否則豬扒好快黑晒，但火又唔可以太細，否則又會唔夠脆喎(我今次就係衰在火唔夠猛，所以唔夠脆，雖然味道ok)。大約炸10分鐘(我落得油少, 變半煎炸)。(剛睇完開心大發現，人地教炸豬扒用2分鐘炸，證明我個火真係太細！)

煎秋刀魚：

材料：秋刀魚3條、粗鹽適量

做法：

1. 洗淨秋刀魚，剪去魚頭，再剪開魚有腮腸的一邊，用刀挑出所有腮腸和血絲，再用水沖洗魚的內外。

2. 用粗鹽抹魚的內外，用水沖淨一次。

3. 再於魚的內外抹d鹽來醃數小時。

4. 燒熱鑊，落d油，油熱後放魚，每邊煎4-5分鐘，一邊煎夠先好反轉煎另一邊，否則魚皮會黏鑊。